مش سيرة ذاتية — دي قصتي.

دخلت كلية العلوم جامعة الإسكندرية لأن مجموعي مجابش هندسة!

فضلت سنتين جوه الكلية مش فاهم أنا بعمل إيه بالظبط — مجرد إني بحاول اذاكر قبل الامتحانات وخلاص.

ربنا كرمني أول سنة وجبت GPA عالي، وساعتها بدأت الحيرة: أكمل كيمياء؟ ولا أدخل حاسب؟

الوقت ده مكنتش أعرف أي حاجة عن البرمجة حرفيًا..

فاكر يوم واحد من زمايلي قال: "يا بخت باقي الكليات... عندهم إجازة صيفية."

استغربت وقلت له: "إيه؟ إحنا معندناش إجازة؟"

قال: "لا عندنا... بس المفروض نستغلها ونطور نفسنا."

وقتها قلت في نفسي: "الكلام ده فكسان."

لكن بعدها بفترة، ربنا سبحانه وتعالى - الكريم المنعم - ألقى في نفسي إني أبدأ أتعلم بجد.

استشرت إحدى المعيدات عندنا، فقالت لي: "أنت درست Java في أولى وتانية، جرّب أندرويد."

ذاكرت أندرويد شوية...

بس بصراحة، معجبنيش.

ده غير إن اللاب بتاعي كان ضعيف أصلًا، فكان رافض التفاهم مع Android Studio 😂

دخلت سنة تالتة.

أول ترم درست مادة الويب، وكان مطلوب مننا نعمل مشروع.

عملت Landing Page لمعرض سيارات.

كانت سيئة جدًا 😂

بس كانت أول مرة أحس إني مستمتع وأنا بذاكر حاجة... وساعتها بدأت أفكر إن ده ممكن يكون المجال اللي أكمل فيه.

من إجازة نص السنة بتاعت سنة تالتة بدأت أذاكر ويب بجد.

وأقول كما قال ابن القيم رحمه الله:

«حتى أتاح لي الإله بفضله... من ليس تجزيه يدي ولساني.»

وده كان بشمهندس أسامة الزيرو.

ذاكرت معاه HTML وCSS وJavaScript من خلال قناته.

بعدها اتفرجت على فيديوهات الـ CRUD لعبدالرحمن جمال، وسلسلة JavaScript المتقدمة لأكاديمية ترميز، وبعدها كورس React لـ Jonas.

وفي حوالي تسعة شهور تقريبًا...

بفضل الله وحده...

كنت اتعلمت Front-End، وربنا كرمني بأول فرصة تدريب في Capivo.

بعدها ربنا كرمني بأول وظيفة حقيقية بمرتب.

وكان السبب - بعد فضل الله - صديقي عبدالرحمن، ربنا يجازيه عني كل خير، لما رشحني للشغل في مشروع «قياس التحول الرقمي».

ومن هنا بدأت الرحلة المهنية بجد... 🚀

أما باقي القصة، هتلاقوها في قسم Experience في الصفحة السابقة 😂

النهارده أنا Front-End Developer بشتغل على منتجات حقيقية.

ولو في حاجة اتعلمتها من الرحلة دي... فهي إن ربنا إذا أراد لك خيرًا، هيهيئ لك أسبابه.

الحمد لله على كل خطوة فاتت...

ولسه اللي جاي أحسن بإذن الله. ❤️